Уште 210 тони земја контаминирана со линдан се спакувани во ОХИС и подготвени се во наредните два месеца да бидат транспортирани во Франција, соопшти Министерството за животна средина и просторно планирање (МЖСПП).

„Чистењето на малата (делта) HCH депонија во ОХИС продолжува со ремедијација на Лот 3, со кој ќе се отстранат 525 тони на HCH отпад и 210 тони на земја контаминирана со HCH. Во рамките на досегашните активности спроведени за ремедијација на третиот лот, ископани и спакувани се 210 тони на земја контаминирана со HCH чиј извоз е планиран за следните 2 месеци и ископани и спаковани се 231 тон на HCH отпад, од кој околу 80 тони, во текот на вчерашниот ден се извезени на уништување во Франција“, се наведува во соопштението.

Како подготвителна активност, МЖСПП на 9 јуни 2023 година донесе Решение за одобрување на планот за ремедијација за Лот 3 кој е доставен од страна на изведувачот на чистењето, компанијата Полиеко, по што истата од 12 јуни 2023 година продолжи со работа.

Од Министерството потсетуваат дека во претходниот период, како резултат на активностите поврзани со чистење на првите два лота од малата (делта) HCH депонија во ОХИС, се извезени и уништени 957 тони на HCH отпад и 127 тони на земја контаминирана со HCH.