На планината Жеден над изворот Рашче, на непристапен терен вечерва избувна пожар. Огнот се гледа од Скопје, но директорот на Центарот за управување со кризи  Стојанче Ангелов во изјава за Слободен печат смирува дека опожарените места не се големи и оти очекува ноќеска самите да се изгаснат поради ниските температури и влагата. Ако и утре изутрина пожарот е активен ќе мора да интервенира хиликоптер поради непристапниот терен, вели Ангелов.

Горат грмушки и трева, а високи стебла не се зафатени. Директорот на ЦУК вели дека изворот Рашче не е загрозен. Ангелов претпоставува дека намерно се запалени ниските и трнливи грмушки, за да ги чистат пасиштата за овците. Во близина на опожарените пасишта нема објекти.