Англија не успеа да ја победи Македонија како гостин на крајот од квалификациите за Европското првенство (ЕП) кое ќе се игра во 2024 година, сепак странските навивачи велат дека имале пријатно патување во Скопје.
Алан Хотон заедно со колегите англиски навивачи, во Северна Македонија допатувал во понеделникот . Тој во својот текст го опишува патувањето и импресиите од Скопје, па така со летот од аеродромот Ист Мидлендс во понеделникот во 6.30 часот тргнале во главниот град на Северна Македонија.
-Официјално наречена Северна Македонија во 2019 година, тие беа познати како Поранешна Југословенска Република Македонија, по распадот на Југославија во 1991 година. Скопје датира повеќе од 7.000 години со докази за Римската и Отоманската империја и е родното место на Мајка Тереза. Прекрасен град со снежни планини во далечината, а низ средината тече реката Вардар, вели тој.
Понатаму Хотон раскажува дека градот има многу мостови кои ја преминуваат реката Вардар од Центарот до Старата чаршија, а најпознат е Камениот мост, кој датира од византиско време и обновен околу 1450 година.
Има цркви, џамии и други прекрасни градби околу градот, а особено покрај реката. Насекаде има и статуи, во знак на сеќавање на локалните херои и настани. Скопското Кале има поглед на градот и беше бесплатна за посета. Шон О’Гара и јас се сретнавме со колегите фанови Фил, од Порт Вејл, Џонатан од Вест Бромвич Албион и Луси од Оксфорд Јунајтед седнавме на ручек и јас порачав пилешки стек во сос од печурки со ориз и безалкохолен пијалок за 350 денари, околу 5 фунти! По интересната обиколка на градот, ја најдовме пивницата Стар град, која имаше прекрасна пивска градина, жива музика и многу пристојно пиво Скопско по цена од 2,50 фунти за половина литар, вели тој.
По одличниот ден, Хотон вели дека се упатиле пешки до стадионот „Тодор Проески“, покрај реката Вардар.
-Стадионот е именуван во чест на македонскиот поп идол, Тодор Проески, кој за жал загина во сообраќајна несреќа, на возраст од само 26 години. Имаше масовно обезбедување околу градот и стадионот, со стотици, ако не и илјадници полицајци на должност, вооружени со палки и штитови. Тие не беа наметливи, туку само избраа да одржат присуство. Безбедносните претреси не беа полоши отколку што ќе ги добиете дома. Гласините дека не можете да внесете монети и клучеви на стадионот беа неосновани, додава Хотон.
Тој вели дека Англија одиграла добро, контролирајќи го поголемиот дел од натпреварот. Судијата се чинел малку сомнителен, им давал слободни удари на Македонците.
-По мечот, бевме задржани на стадионот повеќе од 30 минути. Кога бевме пуштени, беше околу 30 минути пешачење назад до местото на тргнување и потоа уште 30 минути чекање за полициска придружба назад до аеродромот. Неизбежно, ова значеше дека авионот мораше да се одложи, но Sport Options и персоналот на скопскиот аеродром направија брилијантно за да нè спроведат пријавувањето и обезбедувањето што е можно побрзо. Полетавме со околу еден и пол час доцнење. Долг ден, но уште еден добар ден по Англија на гости, вели тој во својата репортажа.
