СВР Велес извести за целосен прекин на сообраќајот од 07:30 часот утрово, на автопатот „Градско-Прилеп“, кај село Реац, меѓу тунелите на место викано „Раечка река“, заради излевање нa коритото на истоимената река покрај патот.

Согласно информацијата од АМСМ на клучката кај „Мотел Дреново“, на коловозот има големо количество вода, додека пред тунелите кај „Плетвар“ има свлечиште и одрон од карпи.

Се преземаат мерки за расчистување. На терен се тим од Полициската станица ПС Градско и екипа со механизација којашто работи на испумпување на водата и расчистување на патот.

Центарот за управување со кризи предупредува да не се поминува по мостот кај село Пчиња, бидејќи тој е со слаба конструкција и за два часа ќе дојде до зголемен притисок. Поради зголеменото ниво на водите во Крива Река кои ќе дојдат и до реката Пчиња, постои опасност од уривање на мостот во селото Пчиња.

Исто така, се предупредува на внимателност при движење покрај речните корита и поројни суводолници, особено во реони на поројни поплавувања бидејќи се очекуваат локални кратки но поројни дождови.

ЦУК презема превентивни и координативни мерки по информацијата од Управата за хидрометереолошки работи за зголемен водостој на локалните реки и на реката Вардар.

Конкретно беше известено дека заради зголемен водостој на реката Вардар во горниот дел од текот, на сливовите со одредени притоки, се можни излевања во Полошката Котлина, Тетовски-Гостиварскиот регион, потоа во сливот на Река Лакавица и на други критични места во горниот дел од сливот на реката Вардар.

На територијата на Општина Куманово на повеќе локации имало паднати  дрвја како последица на поројните врнежи од дожд и силниот ветер. Покачен е водостојот на реката Кумановка во село Доброшане, но нема опасност од поплавување на куќите и излевање на река.

Крива Паланка вчера беше зафатена од силно невреме по што дојде до нагло зголемување на водостојот на Крива Река, Домачки Дол и Киселичка Река. Од зголеменото ниво на Крива Река дојде до излевање и поплавување на брегот. Во месноста Домачки дол се интервенира со една машина. Пријавена е и опасност од поплавување на новоизградени куќи и објекти на улицата „Глигор Прличев“ во Крива Паланка. Има поплавена куќа кај Пролетер. Отсечено е селото Т‘лминци со 20 жители, од надојдената река преку мостот. Надојдени се водите на Куков Дол. Кај место викано „Над Базен“ има излевање на водата на Крива Река. На патниот правец Крива Паланка – село Луке“ од синоќа сообраќајот е целосно во прекин во двата правци поради свлечиште.

Во Општина Старо Нагоричане надојдена е и реката Пчиња кај Пелинце.

Од Општина Липково известија дека нивоата на реките е зголемена, но нема опасност од поплавување. Акумулациите Глажња и Липковско Езеро се полни и има прелевање, но нема опасност од излевање на речното корито.

Во Прилеп се испумпуваше вода од деловн објекти на улиците „Трајко Николоски“ и „Раде Ивановски“.

Во село Долно Агларци (Општина Новаци) имаше поплавување на дворни површини заради нефункционирање на пропуст на одводен канал. 

Регионалниот ЦУК Тетово известува дека се излеала реката Лакавица во нивите на село Турчане.

Екипите на Општина Македонски Брод синоќа цела ноќ биле на терен за да ги санираат последиците од поплавените улици низ градот и на неколку свлечишта во околината.

Центарот за управување со кризи презема превентивни и координативни мерки утрово по информацијата од УХМР за зголемен водостој на локални реки и реката Вардар. Можни се излевања во Полошката Котлина, тетовско-гостиварскиот регион, во сливот на река Лакавица и на други критични места во горниот дел од сливот на Вардар.   

Сообраќајот на регионалниот пат Градско – Прилеп од утрово е во целосен прекин поради обилни врнежи од дожд и излевање на Раечка Река, кај село Раец.