Од шармантни авении покриени со цвеќиња до импресивни булевари со историски градби – речиси секој град ја има „онаа“ улица која привлекува бројни туристи како магнет со својата убавина и богата историја. Секоја од нив има своја приказна и душа која го отсликува карактерот на градот во кој се наоѓа, пишува „Пун куфер“.
Престижното списание за патувања „Конде наст“ состави листа со најубавите улици во светот, а на прво место се најде стариот француски град Колмар и неговите шармантни улици.
Шарени куќи со живописни фасади и препознатливи дрвени греди, слатки мостови кои се протегаат над реката Лауч, прекрасни слаткарници, ресторани и кафулиња кои мамат со својот бајковит шарм… Сето ова е Колмар, еден од најубавите мали гратчиња во Европа, а медиумите често го опишуваат и како најромантичниот град во светот.
Таму е прекрасно во секое време од годината – најфотогенично е на пролет, кога сè е расцутено, а во зима се претвора во вистинска мала божиќна бајка.
Градот на романтиката
Колмар е град, но неговата „селска атмосфера“ е присутна на секој чекор.
Легендата вели дека Колмар е толку убав што за време на двете светски војни британските и американските сили намерно избегнувале да го бомбардираат. Како резултат на тоа, денес е еден од најдобро зачуваните стари градови во Франција.
Исто така, Колмар е главен град на вината од Алзас и е домаќин на годишниот саем за вино во Алзас во август, кој е стар дури шест децении. Овој настан привлекува околу 300.000 луѓе од целиот свет секоја година и нуди одлична забава и дегустација на врвни вина.
Совршена туристичка дестинација
Иако Колмар е на 500 километри од Париз, најбрзиот воз може да ве однесе таму за само два и пол часа.
Француските железници се модерни, брзи и удобни, а многумина ќе се согласат дека нема ништо подобро од удобно да седите покрај прозорецот, со омилената книга и пијалокот до вас, и да уживате во прекрасната глетка однадвор.
Како јаготка на шлагот, вие ќе пристигнете во град кој е синоним за убавина, романтика и опуштена прошетка.
