Иницијативата „На Точак“ на група ентузијасти со цел подобро велосипедско Скопје, реагира на завршувањето на изградбата на улицата Васко Карангелески, што беше објавено од страна на Град Скопје како „проект со чија реализација се овозможува сообраќајно поврзување на три главни булевари во општина Аеродром“.
„Град Скопје сподели дека „Завршена е изградбата на улицата Васко Карангелески“. „Изградбата“ е проширување на коловоз на улица до училиште, базен, полициска станица. Проширување за кое и покрај протестите и предупредувањата од јавноста, жителите и експертите беа исечени десетици возрасни дрвја, за која беше асфалтирано многу зеленило, за која се уништи мирот на децата и жителите. Што е потрагично – за се ова беа предупредувани градските власти со години“, велат во објавата „На Точак“.
Оттаму потсетуваат дека улицата „беше проектирана во мандатот на Коце Трајановски, а за хоророт што ќе следи беше предупреден градоначалникот Петре Шилегов“.
„Сегашната градоначалничка Данела Арсовска ветуваше дека ќе го ревидира планот и нема да дозволи да се сечат дрвја или да се одзема зеленило за на крај да го изведе истиот проект од претходниците. Дури и градоначалникот на Општина Аеродром Тимчо Муцунски излегуваше на протестите организирани за зачувување на зеленилото.
Но на крај добивме уште еден автодром со 4 предимензионирани коловозни ленти. А „велосипедската патека“ е уште една патека за контејнери.
- Градоначалничката ветуваше во предизборието дека ќе ги дислоцира контејнерите од вело патеките, а сега поставува нови на новите патеки.
- Дури и да морало таму да има контејнер, дали е логично да нема заобиколување и тоа да се ОБМИСЛИ и изведе ОДНАПРЕД, а не да се “тупнуваат” отпосле?
Сериозно, не знаевте дека ќе требаат контејнери на улицата кога се правеше проектот?
Се изненадивте?“, прашуваат од Иницијативата.
Нагласуваат дека „зеленилото што е засадено е жардињерско, наместо дрвја кои прават сенка и растат со децении.
„Толку густо се засадени дрвцата што мораме да се запрашаме дали има некаква цел освен купување (трошење повеќе јавни пари) и броење поголем број садници?! (небитен квалитетот и видот, битно засадиле толку и толку „дрвја“). А од тој ѕид од дрвца не се гледаат пешаците кои излегуваат на преминот бидејќи крошните на дрвцата се ниски колку мали деца. Пред пешачките премини учениците ќе бидат невидливи за возачите на коли“, се наведува во објавата.
Од Иницијативата велат дека „од катастрофалната изведба се жалат и самите жители во коментари на постот на Фејсбук од Град Скопје.
„Изведбата на велосипедската патека е под секое ниво, брановидна, како рачно тапкана со лопата, а не со механизација. Ако досега пишувавме дека последните реконструкции на улици се пропуштени шанси за подобра велосипедска инфраструктура (пр. ул. Есенинова, Даме Груев, АСНОМ), оваа шанса не само што е пропуштена туку е свесно прокоцкана. Оваа градска власт не учи од грешките кои беа правени пред 10-15 години туку ги копира“, потенцираат во објавата „На Точак“.
Градоначалничката Данела Арсовска во соопштение од Град Скопје, наведува дека „со изградбата на улицата жителите на овој дел од Скопје добиваат ново сообраќајно поврзување помеѓу булеварите АСНОМ, Јане Сандански и Трета македонска бригада, со што значително ќе се намали сообраќајниот метеж со кој беа секојдневно соочени жителите на Аеродром“.
Ваквите сообраќајни решенија покрај својата основна функционалност ја зголемуваат безбедноста и сигурноста за сите учесници во сообраќајот – истакна градоначалничката Арсовска.
Арсовска додаде дека овој проект претрпе повеќе измени за да се зачувува зеленилото, бидејќи во претходниот проект беше предвидено сечење на дрворедот по целата должина на улицата.
„Со промените коишто ги направивме во проектот, над 100 дрвја беа зачувани, а со специјална машина за пресадување на дрвја се пресадија повеќе здрави дрвја на потегот кај основното училиште „Љубен Лапе“ и на локација на самата крстосница. Деновиве во рамките на есенската акција по должината на улицата се засадени 825 нови садници“, вели Арсовска.
Од Град Скопје истакнуваат дека „со ова целосно ново булеварско решение и поврзување со две коловозни ленти во двата правци, во должина од 1.100 метри и вкупна површина од 10.600 квадратни метри улицата има нови пешачки и велосипедски патеки од двете страни, како и ново јавно осветлување, а на дел од трасата на улицата се изгради нова атмосферска канализација.
Извор: Фронтлајн
