Владата на Нов Зеланд ќе ја забрани употребата на мобилни телефони во училиштата поради загрижувачкиот пад на писменоста на учениците, изјави конзервативниот премиер Кристофер Луксон.

„Ќе ги забраниме телефоните во училиштата. Сакаме нашите деца да учат, а нашите наставници да предаваат“, рече Луксон за време на посетата на училиште во Оукленд.

Тој изјави дека тоа ќе го спречи нарушувањето на часовите и ќе им помогне на учениците да се фокусираат на материјалот, објавија новозеландските медиуми.

Истражувачите од една добротворна организација за образование во Нов Зеланд минатата година предупредија дека земјата се соочува со „криза на писменоста“, откривајќи дека повеќе од една третина од 15-годишниците едвај знаат да читаат и пишуваат.