Се верува дека ова е прво меѓународно туристичко патување во споменатата земја од почетокот на пандемијата. Туризмот во Северна Кореја е строго контролиран. На поединечни патници не им е дозволен влез во земјата, а групите се придружувани од стражари. Приходите од туризмот се користат за финансирање на режимот на Ким Џонг-ун.

Патувањето не е без ризици. Американскиот студент Ото Вармбиер беше приведен за време на патување во Северна Кореја во 2016 година, наводно за кражба на пропаганден плакат. Тој бил вратен во САД 17 месеци подоцна во лоша состојба и набргу потоа починал.

Бичцова и остатокот од групата пристигнале во Пјонгјанг на 9 февруари, патувајќи со севернокорејскиот авион на Ер Корјо од Владивосток. Иако Бичцова признава дека била загрижена, вели дека победила љубопитноста и дека не можела да ја пропушти можноста да види земја која ретко кој туристи има можност да ја истражи, пишува Си-Ен-Ен.

Слична напнатост наведува и блогерот Илја Воскресенски. На домаќините им рекол дека продава антички јадења, што всушност му е хонорарна работа, но не им открил дека е и патописец. Тој додаде дека една од причините зошто отишол на патувањето е да дознае дали денешната Северна Кореја може да се спореди со Советска Русија за која му раскажувале членовите на неговото семејство.

„Кога ќе ја погледнете Северна Кореја, ќе сфатите дека вашите баба и дедо живееле како овде. Тоа е телепортација во минатото. Во градот нема апсолутно никакви реклами. Единственото нешто што е изложено се партиски слогани, знамиња и слично“, посочи тој.

Четиридневното патување го чинело секој посетител околу 750 долари. Групата цело време со себе имала водичи и преведувачи. Маршрутата вклучувала посети на бронзените статуи на покојните лидери Ким Ил-сунг и Ким Џонг-ил на ридот Мансу, детската палата Мангјонгдае, каде децата извеле музичка изведба, како и три дена во скијачкиот центар Масикрионг.

На Русите им биле дадени и строги правила да се придржуваат, особено кога станува збор за фотографирање и снимање. „Од нас беше побарано да не ја фотографираме армијата или луѓето во униформа воопшто, да не фотографираме градилишта или некоја од зградите во изградба“, објасни Бичцова.

„И постоеја правила за тоа како да фотографирате и генерално да ракувате со портрети или скулптури на лидери. Ако имате весник или списание со слика на лидерот, не можете да го свиткате весникот така што портретот е збрчкан“, додаде таа.

Таа истакна дека нема многу што да се купи, но има две продавници – една на аеродромот и една во главниот град – кои нудат магнети, кукли и други мали подароци. Пред пандемијата, најголемиот извор на туристи кои доаѓале во Северна Кореја биле од Кина.

Сепак, Русите сега се првите на кои им било дозволено да ја посетат Северна Кореја по пандемијата, што е знак за зголемената популарност на Русија во Северна Кореја. Соработката меѓу двете земји предизвика тревога кај американските разузнавачи.

Северна Кореја ја снабдува Русија со ракети за борба против Украина. Во февруари, рускиот претседател Владимир Путин му подари автомобил на својот севернокорејски колега Ким Џонг-ун. Бичцова и Воскресенски наведуваат дека нивната одлука да патуваат не била мотивирана од политика, туку од желбата да се сретнат со локалното население и да воспостават врски.

Но, по враќањето Бичцова не верува дека воспоставувањето односи е навистина возможно во севернокорејскиот систем. „Околу 200 деца – ги изброивме на сцената – подготвија едночасовен концерт специјално за нас. А бевме само 97 луѓе“, се сеќава таа.

„Значи, на сцената имаше повеќе луѓе отколку гледачи. Можевме да почувствуваме дека тие се обидуваат да создадат одредена слика за тоа како изгледа Северна Кореја. Но, некои детали открија дека тоа не е сосема точно, дека постои друг живот“, продолжи таа.

Додека Русите можеле слободно да зборуваат за нивното патување во Северна Кореја и да ги изразат своите размислувања за режимот на Ким, истата привилегија не важи кога станува збор за нивната земја. Критиките на Путин, руската политика и војската се кривични дела во Русија.

Истакнат поранешен функционер на КГБ, кој е воен блогер и гласен поддржувач на војната во Украина, беше уапсен и обвинет за „екстремистички активности“ минатото лето поради критички коментари кон Путин. Минатата недела, 33-годишен маж беше уапсен во Екатеринбург за наводно донирање 51 долар за украинска добротворна организација.

Бичцова и Воскресенски потврдија дека се свесни за кршењето на човековите права во Северна Кореја, но рекоа дека се надеваат дека ќе воспостават контакт со севернокорејските цивили. Велат дека еден ден би размислувале повторно да одат во Северна Кореја, но само доколку се промени политичката ситуација.

„Главната порака на мојата содржина е дека каде било: без разлика на земја, без разлика на националност, таму живеат обични луѓе и секаде треба да се третираат со љубов. Се надевам дека патувањата ќе го спасат светот“, заклучува Воскресенски.

Слично патување на руски туристи во Северна Кореја е предвидено за следниот месец.