Историчарот на уметност, но и познат скопски активист, Никола Писарев соопшти дека на повеќе локации низ Скопје ќе бидат поставени шарени куќички за бездомни кучиња.

Акцијата ја спроведе „Урбани уметнички/герила акции“, којашто работи во состав на Центарот за современи уметности.

„Среќна Нова скопски стритери. Десет куќички за вдомување на кучињата кои живеат по скопските маала. Куќичките се новогодишен подарок за кучињата и за Скопје од групата Урбани уметнички/герила акции.

Во текот на денот куќичките ќе бидат наместени на различни локации во Скопје.

Скопје може да биде и убав град“, пишува во објавата на Фејсбук.

Инаку, Писарев е автор на многу проекти кои имаат силен фидбек во македонското и регионалното граѓанско општество.

Тој е и основач на повеќе граѓански иницијативи, како „Го сакам ГТЦ“, Иницијатива за спасување на реката Радика, „Арсена“, „Охрид SOS“ и многу други локални иницијативи ориентирани кон заедницата.