Украинската фудбалска легенда Андриј Шевченко кој е претседател на Фудбалската федерација на Украина и Надворешен советник за спорт на украинскиот претседател Володимир Зеленски, вчера попладне пристигна во Скопје, каде присуствува на дуелот помеѓу македонската и украинската машка фудбалска репрезентација до 19 години.
Украина на теренот на стадионот „Петар Милошевски“ победи против Северна Македонија со резултат 0:2 . Победникот беше решен кон крајот на првото и почетокот на второто полувреме, најпрвин Кревсун во судиското продолжение ги доведе гостите во водство од 0-1, за Пономаренко во 48. минута да ги постави конечните 0-2.
Шевченко е поранешен украински фудбалер кој важеше за еден од најдобрите фудбалери во светот. Во 2004 година беше награден со престижната Златна топка. Во својата кариера бил играч на Динамо Кијив, Милан и Челси, како и на украинската репрезентација.
Познат бил како фудбалер со неверојатен инстинкт за постигнување голови, бидејќи моментално е трет најдобар стрелец во историјата на Лигата на шампионите, со дадени 59 голови, веднаш зад Раул (77) и Филипо Инзаги (70). Исто така важи и за трофеен спортист, а како негови најголеми дострели се сметаат титулата со Милан во Лигата на шампионите (сезона 2002/2003) и Скудетото во Серија А (2003/2004). На репрезентативен план, под водство на тренерот Олег Блохин, успеал со Украина да влезе во четвртфиналето на Светското првенство 2006 год, каде загубиле од подоцнежниот првак Италија.
На 28 јули 2012 г. се повлекол од активното играње фудбал. Неговиот последен натпревар бил на Евро 2012, каде Украина биле домаќини, и тоа против фудбалската репрезентација на Англија. Последниот клуб во кој настапувал бил Динамо Кијив.
Дуелот помеѓу фудбалските репрезентации на Северна Македонија и Украина до 19 години, го стартува квалификацискиот турнир од елитната рунда во обид да се избори настап на Европското првенство, чиј домаќин од 15 до 25 јули ќе биде Северна Ирска.
Избраниците на селекторот Тони Јакимовски се дел од групата 7 во која за противници ќе ги имаат селекциите на Швајцарија, Украина и Латвија, а пласман на завршниот турнир ќе обезбеди само првопласираната репрезентација.
Во вториот дуел од воведното коло во квалификациската група 7, на стадионот на Македонија Ѓорче Петров ќе играат Швајцарија и Латвија.
Македонските фудбалери во второто коло в сабота во истиот термин во комплексот „Петар Милошевски“ ќе играат против Швајцарија, а во последното коло на 26 март за противник ќе ја имаат Латвија.
