Брисел стана платно за многубројни белгиски, но и меѓународни уметници. Токму овие артисти од градот направија еден живописен простор исполнет со многу мурали, графити и разноразни уметнички дела, се вели во објавата на Црнобело.

Многумина за Брисел велат дека е галерија на улична уметност, и тоа на отворен простор.

Без разлика во кој дел се наоѓате, бидете подготвени да налетате на ѕидови суптилно разубавени или огромни површини пропратени со белгискиот немирен хумор.

 

Верувам дека секој од нас во својот мобилен телефон има слободен простор за нови фотографии кои нè потсетуваат на моментите од нашите патувања.

И, вие нема да го оставите мобилниот смрзнувајќи ги оние живописни делови од градот кои за туристите се мелем за очи и душа.

Од друга страна, пак, многумина се запознаени дека Белгија е позната и по стрип индустријата, па токму поради тоа во Брисел постои рута за улична уметност која содржи различни мурали на белгиски и француски стрип ликови. Тоа не се пропушта.

Ако не се лажам, мислам дека има околу 50 мурали, скоро сите се позиционирани во центарот на Брисел, но ги има и оние што се надвор од него.

Така што, кога ќе бидете во Брисел дајте си можност да откриете дел од овие мурали кои гласно зборуваат за историјата и традицијата, а истовремено ќе ги посетите и атракциите на градот кои можеби се наоѓаат од ваша лева или десна страна, или една уличка подолу.

Ако некој се реши да ја изоди оваа рута, мислам дека ќе му треба околу 3 часа.

Тука споделувам само еден дел од онаа што се крие низ улиците на Брисел, за другото ќе препуштам да го спознаете преку личното искуство.

Со добри патики и сонце, ќе имате 100% исполнет ден со по некоја слатка вафла, порција пржени компирчиња и многу пива.