Во текот на минатиот месец, Комунална Хигиена отстрани вкупно 1.600 кубни метри отпад од диви депонии на територијата на градот Скопје.

И покрај тоа што основната дејност на претпријатието е собирањето и транспортот на комуналниот отпад од домаќинствата и правните субјекти, екипите на Комунална Хигиена секојдневно се максимално ангажирани за извршување вонредни активности како што е расчистувањето диви депонии коишто настануваат како резултат на непрописно одлагање отпад на јавни и сообраќајни површини.

Во оваа насока, од претпријатието апелираат до граѓаните својот отпад да го одлагаат исклучиво во наменски поставените садови – контејнери, канти или корпи за отпадоци. Воедно, оттаму сметаат дека е неопходна поголема ангажираност на соодветните институции задолжени за санкционирање на прекршителите на Законот за јавна чистота, бидејќи ЈП Комунална Хигиена нема надлежност да изрекува санкции за непрописно одлагање отпад.

-Екипите на Комунална Хигиена во текот на изминатиов викенд  беа ангажирани и за санирање на последиците од невремето што го зафати градот Скопје, при што се вршеше подигнување на паднатите дрвја, отстранување на лисјата, како и рачно и машинско метење на поголемите улици и булевари во градот. Исто така, беа реализирани и две интервенции за расчистување сообраќајни површини по сообраќајните незгоди што викендов се случија во општините Аеродром и Ѓорче Петров – потенцираат од претпријатието.