В сабота, на 18 февруари во 19 часот, во Младинскиот културен центар ќе се одржи хуманитарен настан насловен „МКЦ е Солидарност!” за помош на настраданите од земјотресите во Турција и Сирија.

Во рамки на настанот ќе настапат музичките групи Дориан и Добрила дуо, Џенгиз Ибрахим, Зарина Првасевда, Cruel, Занаду, Vaigna Corporaiton и Калата.

Покрај музичкиот дел, ќе се случи и аукција на ликовни дела од локални уметници, како и изведба на театарската претстава „Шопинг енд факинг” во продукција на НУ Турски театар Скопје.

„Со оглед на последните случувања во врска со катастрофалниот земјотрес кој ги погоди централниот дел на Турција и северна Сирија, ЈУ Младински културен центар како институција основана во пост земјотресно Скопје, како проект на светската солидарност, чуствува должност и потреба да се вклучи во хуманитарните настани кои се случуваат во овие тешки денови и даде свој придонес за помош на погодените семејства“, велат од МКЦ.

Влезниците за театарската претстава и музичкката програма се наплаќаат засебно, по симболична цена од 150 денари, со можност публиката да откупи и повеќе билети. Собраните средства од аукцјата на ликовните дела ќе бидат исто дел од сумата за донација.

Хуманитарната помош ќе се исплати во целост и донира на сметките отворени за оваа намена преку Црвениот крст, додека средствата од делата продадени на аукцијата ќе бидат донирани во поставените кутии од Црвениот крст на Град Скопје.

Во Џебното кино, е закажана бесплатна проекција на серијалот “Турски чај” во режија на Петра Селишкар.