Градоначалничката на Скопје Данела Арсовска во интервју за Канал 5 ТВ најавува дека мостот „Беласица“ многу скоро ќе биде пуштен во употреба за сообраќај и ќе биде безбеден.
Според неа дека во извештаите од Приватниот институт за сеизмички отпорни градби и климатски промени не е забележано во ниту еден дел на мостот изложеност на каблите за пренапрегање туку се скриени со заштитен слој на бетон.
-Наредната недела мостот „Беласица“ ќе може да биде пуштен во употреба за пешаци и возила, рече тогаш Арсовска.
Мостот „Беласица“ е една од клучните артерии во Скопје која поврзува два дела од градот, се наоѓа на потегот од Железничката станица до трговскиот центар „Ист гејт“. Беше оштетен во пожар ноќта помеѓу 11 и 12 мај, по што Град Скопје го ангажираше приватниот Институт за сеизмички отпорни градби и климатски промени за да направи експертиза за оштетувањата и потребната санација.
Пред десетина дена директорот на Институтот, Михаил Гаревски, изјави дека драфт верзијата од извештајот е готова и предадена на градските власти и рече дека оштетувањата се мали, но ќе треба ситна санација.
Деканот на Градежниот факултет Горан Марковски, пак, неколку пати јавно порача дека е потребно детално испитување, исто како и вчера кога на прес-конференција укажа оти е потребна неопходна темелна истрага за да се осигури безбедноста пред мостот да се пушти за употреба. Професорот не сакаше да тврди дека мостот има сериозни оштетувања, но инсистираше на тоа дека се неопходни детални анализи.
„Генерално, сешто може да е случено во мостот, и според мене од инженерски аспект треба да сме потполно сигурни каква е неговата состојба, пред да го пуштиме во употреба. Не значи дека тој ќе се урне по една недела или кога ќе се пуштат возила, може да се случи нешто по неколку години, можеби никогаш да не се случи, а да е оштетен. Меѓутоа, мораме да знаеме, тоа е она за што јас се залагам … Далеку сум од уривање на мостот, постојат методи за санација, уривање за мене не е опција“,рече Марковски.
