Во вторник скопјани  ќе ги користат услугите на Јавното претпријатие со намален број, бидејќи дел од возачите на ова претпријатие ќе штрајкуваат од 4:30 часот. Бараат зголемување на платите и почитување на работничките права, додека се жалат дека нивните барања веќе подолго време не се земат во предвид.

„Не бараме само зголемување на платите, бараме законски права кои не се почитуваат од раководството на ЈСП и од минатото и од новото раководство, не се исплаќа прекувремена работа што е законска обврска, храна не се плаќа за вработените кои работат ноќе. Работниците на ЈСП немаат право на пауза, некои работат повеќе од 8 часа, додека според законот  оние кои работат повеќе од 6 часа имаат право на половина час пауза. Возачите немаат услови за безбедност и здравје при работа, секојдневно се под стрес и здравствени проблеми и доколку се направи соодветен лекарски преглед ќе се потврди“, изјави Марјан Поповски, претседател на синдикатот „Спајс-Македонија“.

Тие ги повикуваат сите да не прифаќаат работни налози тој ден и да се придружат во штрајкот.

„Поради сите одлуки од колективниот договор што ги потпишаа и не се спроведени во пракса, се одлучивме за радикална активност, поточно за штрајк, бидејќи не постигнавме разбирање и договор со нашите структури и тоа мораше да се случи. Ги поканувам сите вработени во ЈСП без разлика дали се наши членови или не, бидејќи тоа го правиме за доброто на сите. Од другите синдикати на ЈСП не добивме одобрение или позитивен одговор, но сепак ги повикувам сите вработени да излезат и да се изразат бидејќи тоа го прават за доброто на сите“, изјави Елизабета Тошевска, раководител на синдикалната организација Спајс при ЈСП .

Јавното претпријатие има околу 600 вработени, но според овој синдикат досега околу 180 потврдиле дека ќе протестираат. /Алсат